შეცოდებანი

ლუის კენედის „შეცოდებანი“ არის წიგნი ჩვეულებრივ ადამიანებზე, რომელთაც ჩვეულებრივი ცხოვრება სურთ „არაჩვეულებრივ“ დროებაში. მთავარი გმირი, კუშლა ლავერი, ახალგაზრდა ქალია, რომელიც ირლანდიის პატარა ქალაქში ცხოვრობს. მისი ცხოვრება თავდაყირა დგება მას შემდეგ, რაც ერთ საღამოს, პაბში, ბელფასტელ ცოლიან მამაკაცს ხვდება და, შედეგად, სულ უფრო მეტად ეფლობა იმ რეალობაში, სადაც სიყვარულს საზღვრები აქვს, ინდივიდუალური სურვილები და სოციალური რეალობა კი ხშირად შეუთავსებელია. „მნიშვნელობა არა აქვს, რას აკეთებ, — უთხრა მაიკლმა კუშლას, — მთავარია, ვინ ხარ“. და შემდეგ, მკითხველი ხედავს, რომ მთელი თხრობა ამ ბუნდოვანებას ეხება — რეალისტური ნაწარმოების ტრადიციულ თემას, ქმედებისა და პიროვნების ჭეშმარიტი რაობის შეპირისპირებას, რომელიც წიგნში სოციალურ-პოლიტიკური დაპირისპირების ფონზე ვითარდება. რა ფასად უჯდება წყვილს აკრძალული კავშირი? ანდა რამდენად შესაძლებელია ბედნიერების პოვნა სამყაროში, სადაც „ვინ ხარ“ უფრო მნიშვნელოვანია, ვიდრე „რას აკეთებ?“

ლუიზ კენედი ირლანდიელი მწერალია, რომელმაც ბოლო წლებში დიდი აღიარება მოიპოვა. იგი გაიზარდა ბელფასტის მახლობლად, ჩრდილოეთ ირლანდიაში და ცხოვრების დიდი ნაწილი მზარეულად მუშაობდა, მანამ, სანამ 40-იან წლებში წერა არ დაიწყო. კენედიმ ლიტერატურული კარიერის დასაწყისში სახელი გაითქვა მოკლე მოთხრობებით, რომლებიც ქვეყნდებოდა სხვადასხვა ჟურნალში, მათ შორის: The Stinging Fly, The Tangerine, Banshee, Wasafiri და Ambit. 2021 წელს კენედიმ გამოსცა თავისი სადებიუტო მოკლე მოთხრობების კრებული, The End of the World is a Cul de Sac, რომელმაც კკრიტიკოსების აღიარება დაიმსახურა. ამ წარმატების შემდეგ, 2022 წელს, გამოაქვეყნა პირველი რომანი — „შეცოდებანი". კენედი აქტიურად თანამშრომლობს გამოცემებთან — The Guardian და The Irish Times, ასევე BBC Radio 4-თან. აქვს მაგისტრისა და დოქტორის ხარისხი შემოქმედებით წერაში.