ფეხბურთის კაცი

ზიგმუნდ ფროიდმა თქვა – ადამიანის ცხოვრების პრინციპი სიამოვნებაა.

მის გასაგონად ვიტყვი – ამ სიამოვნებას ფეხბურთი და მოგებული მატჩი ჰქვია!

პირადად ჩემთვის, ფეხბურთი ყველაფერზე მეტია, იმაზე მეტი, ვიდრე ნაციონალური გამოხატვის საშუალება, რადგან ფეხბურთი პირადად ჩემი – ლევან ბერძენიშვილის თვითგამოხატვის საშუალებაცაა!

სპორტში ფეხბურთი ისეთივე სახეობაა, როგორც ლიტერატურაში – პოეზია, ანუ ენის უმაღლეს დონეზე ფუნქციობა!

ფეხბურთი ყველაფერია!

ფეხბურთზე მაღლა მხოლოდ ღმერთია!

ლევან ბერძენიშვილი 1970-1972 წლებში სწავლობდა საქართველოს პოლიტექნიკურ ინსტიტუტში, 1977 წელს კი დაამთავრა ივანე ჯავახიშვილის სახელობის თბილისის სახელმწიფო უნივერსიტეტის კლასიკური ფილოლოგიის განყოფილება და 1991 წელს დაიცვა დისერტაცია მეცნიერებათა კანდიდატის წოდების მოსაპოვებლად. 1978-1994 წლებში მუშაობდა თბილისის სახელმწიფო უნივერსიტეტში უმცროსი მეცნიერ-თანამშრომლიდან ხმელთაშუა ზღვის კულტურების კვლევის სამეცნიერო ცენტრის ხელმძღვანელის თანამდებობამდე, იყო ფონდ „ქართუს“ დირექტორი (1997-1998), ეროვნული ბიბლიოთეკის გენერალური დირექტორი (1998-2004), საქართველოს პარლამენტის ორი მოწვევის წევრი (2004-2008 და 2012-2016); იყო საქართველოს პარლამენტის განათლების, მეცნიერების, კულტურისა და სპორტის საპარლამენტო კომიტეტის თავმჯდომარე, ევროპასთან ინტეგრაციის კომიტეტის თავმჯდომარე (2015-2016), არის რესპუბლიკური პარტიის დამფუძნებელი (1978), რამდენიმე არასამთავრობო ორგანიზაციის დამფუძნებელი, რესპუბლიკური ინსტიტუტის დამფუძნებელი (2008), იყო ამ ინსტიტუტის დირექტორი (2008-2012).