საქართველოს ისტორია, შრომები – II

დავით მუსხელიშვილის „შრომების“ II ტომში გაერთიანებულია მისი ორი ნაშრომი: „საქართველოს ისტორია უძველესი დროიდან XIII საუკუნემდე“ (თბ., 2012) და „საქართველო IV-VIII საუკუნეებში“ (თბ., 2004).

პირველი მათგანი ერთი ნაწილია „საქართველოს ისტორიის“ სამეცნიერო-პოპულარული ხასიათის ერთტომეულისა, რომლის ერთ-ერთი შემდგენელი და კონკრეტული მონაკვეთის – საქართველოს ისტორია უძველესი დროიდან XIII საუკუნემდე – ავტორია დავით მუსხელიშვილი. მეორე ნაშრომი კი მეცნიერის ფუნდამენტური კვლევაა საქართველოს ისტორიის მნიშვნელოვანი პერიოდის, IV-VIII საუკუნეების შესახებ.

ორივე ნაშრომი განკუთვნილია როგორც ფართო მკითხველი საზოგადოების, ისე საქართველოს ადრე და განვითარებული შუა საუკუნეების მკვლევარი სპეციალისტებისათვის.

ისტორიკოსი და მეცნიერი დავით მუსხელიშვილი დაიბადა 19 ოქტომბერი, 1928 წელს. მან დაამთავრა თბილისის სახელმწიფო უნივერსიტეტი 1952 წელს. 1956-1960წწ. მუშაობდა ივანე ჯავახიშვილის სახელობის ისტორიის ინსტიტუტის უმცროსი მეცნიერ თანამშრომელად, 1960 წლიდან - ამავე ინსტიტუტის უფროს მეცნიერ თანამშრომელად, 1967 წლიდან - ივ. ჯავახიშვილის სახ. ისტორიის ინსტიტუტის ისტორიული გეოგრაფიის განყოფილების ხელმძღვანელად, 1999-2006წწ. - ივ. ჯავახიშვილის სახ. ისტორიისა და ეთნოლოგიის ინსტიტუტის დირექტორად, 2007 წლიდან - საქართველოს მეცნიერებათა ეროვნული აკადემიის ისტორიის, არქეოლოგიისა და ეთნოლოგიის კომისიის თავმჯდომარედ; გამოქვეყნებული აქვს 180 სამეცნიერო ნაშრომი. ისტორიის მეცნიერებათა დოქტორი, სადისერტაციო თემა - " საქართველოს ისტორიული გეოგრაფიის ძირითადი საკითხები", დაიცვა 1973 წელს.